Zo Minam Ni Bangzah veina??!!!

1948 February 18-22 sung-in Falam-ah Zomi National Conference om-a, Zogam-ah mipi ki-ukna zat ding thu, February 20 ni-in, Pu Thang Za Kai (Tuithang, Tedim) in thu sung-in, Pu Chun Mang (Lailun, Falam) leh Pu Thang Maung (Kanpetlet) in thukimpih uh hi. (Hih minte leh malgawmte pen Pu Khup Khan Thang' ciapteh bang, ahi hi.)

Tua ni (1948 February 20) pen Zomi National Day a masa-peen (a khat veina) hi leh, 1949 February 20 pen a nih veina (2nd time) hi ding-a kum khat cin'na (1st anniversary) hi ding hi. 1950 February 20 pen a thum veina (3rd time) hi ding-a kum nih cin'na (2nd anniversary) hi ding hi.

Tua ahih man-in 2005 February 20 pen Zomi National Day 58 veina (58th time) hi ding-a kum 57 cin'na (57th anniversary) hi ding hi.

U Zahre Lian in Chin Affairs Minister a sep sung-in, kum khat hiam, kum nih hiam khat Zomi National Day bawl lo hi, ci-in za ngei ing. Tua pen a maan leh, 2005 February pen 58 veina hi lo-in 57 veina ahih kei leh 56 veina hi ding hi.

Bang kum hiam khat-a kipan-in, Kawlgam-ah Zomi National Day kibawl nawn lo-in Zomi State Day kibawl hi. Zomi National Day a kibawl loh zawh kum 25 phial pha ta ding hi (1980 khawng khat pan 2005 ciang). Tua ahih man-in 2005 February 20 pen Zomi National Day pen 33 veina hi mai thei hi (58 vei pan-in 25 vei dok leeng). U Zahre Lian hun lai-a a kibawl loh pen khat vei-in tuat leeng, 2005 February 20 pen Zomi National Day 32 veina hi thei ding hi.

A kum leeuleeu pen, Zomi National Day ih bawl leh ih bawl loh tawh kisai lo-in, a kum a pai toto hi lel ahih man-in, 2005 February 20 pen kum 57 cin'na hi ding hi. (Tu kum-in, kum 35 a pha na hih-a, na suah ni-in pawi na bawl pen 7 vei ahih leh, 7 veina suah ni pawi hi ding-a, na kum bel 35 mah hi veve ding hi.)

2005 February 20 pen Zomi National Day 57 veina (57th time) hi lo-in, kum 58 cin'na (58th anniversary) hi lo hi.


zomikhangthakgroupscopyright.