Investment Pat Baih a Kisapna

Netflix ah Selling Sunset show pen brokerage/real estate firm Oppenheim Group a innzuakte nuntak dan a lak show hi, a tawm in.

Zan nitak season thak ka et leh, Emma kici numei khat khat Oppenheim ah nasem dingin la uhi. Tua nu'n ama tangthu hong gen a....

"Kum 14-15 kiim pan stock investment ka kipan a, kum 17-18 kiim ka phak ciangin ka innkuan business uh sum hong haksa ahihmanin ke'n keima sum tawh ka huh hi. Tun tua ka innkuan business uh multi-million dollar company suakta hi. Tun kei business 2-3 nei in, real estate broker zong ka hi a, kuamah tungah kingalo numei khat ka hi." ci hi.

Thupi ka sa hi. Kum 14 in investment kipanta cih mawk....

Kei bang stock leh investment cih ka zak ciil pen Class 12 ka simlai hi a, academic interest ki nei bek in, ei lei ding, ei a ding in kingaihsun miaulo hi.

Tua bek hilo, financial goal or life goals zong nei mello in kinungta toto hi. Tua manin, ka khuanung ngaihsut ciangin, hong na gen pihpih khat om leh utsing ka ci zel hi. Tua manin khangnote a sum khol a kipan pah thei kei uh zong, a pilna leh siamna (financial education/literacy) nei pah le uh deih sak mahmah hing. School ah la hong kihilh lo, innsung ah lah kigen kha vet lo. Khuasung ah zong kigenlo hi lai. Ka deihsak bek mah hi in, a pat na ding zong kithei tuan mello hi. Hih Group pen tua lam nasepna khat hong hih theih leh bel lungdam huai ding hi.

Khatveivei investment leh sum vai i gen ciangin, sum deihluatna tawh kibang khathei hi. Ahizong in a sum hiam, a nambat sangin a thupi zaw pen:

• Delayed gratification hong sinsak hi - sum a neih ciang in zat pah ding -- van leh nektheih - ngaihsun masalo in, a mailam hun ding khual hi.
• Hong pia Pasian zahtakna hi**. Pasian' thupha ahih lam phawk a, talent 2 hong kipiak leh 4 a suah; talent 4 hong kipiak leh talent 8 a suah ding a hanciam khangno i hih ding ahihi. Topa' pahtak khangno i suak ding hi, tua hi leh...
• Tulai nuntak **consumerism** leh **fads**-te tawh kinawngkai saklo nuntak a siam khangno cihna hi. Jeans hoih penpen, tulai a thang nate leh vante deih masa lo in, tuate sang a thupi zaw **financial independence** a lungulh zaw khangno hi sawm ni.
• Tua nungaknu' i etciang,** kipan baih **ahihmanin kum 30 ahih ciangin a investment picing man ding hi. Hun/time pen investment ah a thupi mahmah factor khat hi.
• Midangte panpih thei** hi. A innkuan business uh a ciacip ding lai huh thei in, tua mahin amah zong hau sak zawsop hi. Midangte a ding in thupha hih ding pen, ei mahmah thupha ngah leh a kemzo i hih ciang piang thei pan hi.

Tulai ciangin internet i khut ah kitawi tekta a, na khempeuh baih mahmah hi. I theihnop, i kannop , i sinnop thute baihtakin kisin theita hi. Tua bek hilo, nidang tawh kibanglo in ei leh ei kisin thei in, sia (teacher/mentor/school) kisamlo hi. Internet ah i sim thu leh late a source kiciante (reliable sources) i teel siam ding thupi zaw hi.

Gentehna in, computer course NIIT pan kana sin ngei kei a, website ka bawl ding ciangin, blog ginazaw deuhte sim in ka bawltawm lel hi. Sum beilo, theihna kibehlap zaw hi.

*A khanglo khangno in, a khangto khangno ahihi. *